Sponsored Links
Advertisement

Pagsuko



Ang dami kong tanong ngayon. Bumalik ang ala-alang nagpalugmok sa akin. Tinatago ko sana ang aking emosyon pero hindi ko na kayang hawakan pa. Kusa itong lumabas sa sariling saliw ng musikang ayaw kung marinig ng iba, sa hampas ng hangin na nagpahina sa aking matikas na kinatatayuan at sa nakapaligid na humahatak sa akin.

Tatakbo ba akong muli?
Sasabay ba ako sa larong hindi ko kabisado ang galaw?
Yayakapin ba ang pasilyong maingat kung nilalakaran?

Hindi ako makagalaw. Nababalot ang aking isip ng mga pagkukunyaring ngiti. Nang mga pangakong namutawi sa kanilang labi. Sumasagwan ako ng buong tapang, hinaharap ko ang naglalakihang hampas ng alon at buong loob ko na tinatahak ang ruta kahit na wala akong maaninag na liwanag. Ito daw ay isang sugal, ito daw ang muling papatay sa aking pagkatao subalit gusto kung humawak sa pag-asang aking nararamdaman.

Mali na naman ba ako?
Kailangan ko na bang tuldukan ang kabanata?
Katangahan na naman ba ito?

Pagod na akong laging malakas. Nanlalata na aking kalooban sa bawat dagundong ng unos na dumadaan. Nangangatal na ang aking katauhan sa sangkaterbang palahaw ng naghihinagpis na agam-agam.

Saan ko ba susukatin ang salitang ligaya?
Sa pagmamahal ng iba?
O sa pagbibigay ko ng kaukulang paglaya sa sarili kung mga hinaing?

Ang hirap maging matapang. Minsan walang magtatanong kung ok ka ba kasi nasanay na silang lahat kaya mo. Minsan, kapag nilalabas ang saloobin hindi rin sila naniniwala, parang pakiramdam nila nagbibiro lang. Mahirap dumaing sa kabila ng sakit na tumatarak sa aking pagkatao. Ang daming naghihikahos, ang daming may malaking problema, dadagdag pa ba ako? Ang pagtalikod ba ng tuluyan ang susi sa pagbukas ng bagong pinto?

Ang pagsara ba ng kabanata ay nangangahulugan ng pagtakas?
Napapagod na ako.
Nagsasawa na ako sa paulit ulit na sakit.

Kinakapos na ang aking isip.
Kinukudlit na ako ng pagsuko.
Pagsukong ako ang tatapos ng lahat.
Walang makakaalam.
Walang makakahalata kung kailan.


8 Comments

  1. ♥superjaid♥ April 8, 2011
  2. Misalyn April 8, 2011
  3. Diamond R April 8, 2011
  4. rainbow box April 8, 2011
  5. Bino April 8, 2011
  6. ISTAMBAY April 8, 2011
  7. The Psalmist April 8, 2011
  8. A-Z-3-L April 9, 2011

Leave a Reply